गाझियाबादच्या सोसायटीतील लिफ्टमध्ये तरुणाचे अशोभनीय कृत्य; संतापजनक प्रकार कॅमेऱ्यात कैद, व्हिडिओ व्हायरल

गाझियाबादच्या इंदिरापुरम भागातील शिप्रा कृष्णा विस्टा या सोसायटीतील एक व्हिडिओ सध्या सोशल मीडियावर मोठ्या प्रमाणात फिरत आहे. या सोसायटीच्या लिफ्टमध्ये बसवलेल्या सीसीटीव्ही कॅमेरात एक तरुण अत्यंत अशोभनीय कृती करताना दिसतो, आणि हेच फुटेज आता नेटकऱ्यांमध्ये चर्चेचा विषय बनले आहे. सोशल मीडिया हे असे एक व्यासपीठ आहे जिथे दररोज वेगवेगळ्या प्रकारचे व्हिडिओ शेअर केले जातात आणि तिथे कधी कोणती घटना समोर येईल हे सांगता येत नाही, त्यातलाच हा एक प्रकार आहे.

व्हिडिओत दिसते की, लिफ्टमध्ये एक व्यक्ती कॅमेराकडे पाठ करुन उभा आहे. दावा केला जातो की, हा तरुण नशेच्या अवस्थेत होता आणि त्याने लिफ्टमध्येच लघुशंका केली. सार्वजनिक जागी अशा प्रकारे वागणे हे पूर्णपणे चुकीचे असल्याचे स्थानिक रहिवाशांचे म्हणणे आहे. या घटनेमुळे सोसायटीतील नागरिकांमध्ये संतापाची लाट उसळली असून काहींनी सोसायटीतील सुरक्षा व्यवस्थेवरही शंका उपस्थित केली आहे.

ही घटना समोर आल्यानंतर स्थानिकांनी अशा वर्तनाला जबाबदार असणाऱ्यांवर कठोर कारवाई व्हावी अशी मागणी केली आहे. असे निर्लज्ज कृत्य करणाऱ्यांवर कारवाई झाली तरच पुढे असे प्रकार थांबतील, असे रहिवाशांचे म्हणणे आहे. लिफ्टमधील सीसीटीव्ही कॅमेरातून मिळालेले हे फुटेज त्यानंतर सोशल मीडियावर पसरले आणि अनेकांनी त्यावर नाराजी व्यक्त केली.

हा व्हिडिओ प्रिया सिंग (@priyarajputlive) या एक्स अकाउंटवरुन शेअर करण्यात आला. पोस्टमध्ये सांगितले आहे की, गाझियाबादच्या इंदिरापुरम येथील शिप्रा कृष्णा विस्टा सोसायटीच्या लिफ्टमध्ये एका तरुणाने लघुशंका केली. ही पोस्ट शेअर होताच काही वेळातच ती मोठ्या प्रमाणात व्हायरल झाली आणि अनेकांच्या नजरेत आली.

ही पोस्ट समोर येताच युजर्सनी मोठ्या संख्येने प्रतिक्रिया दिल्या. एका युजरने लिहिले, "किती किळसवाणे लोक आहेत ते, त्यांच्यासारख्या लोकांनी कचऱ्यातच राहायला पाहिजे... शी!" तर दुसऱ्या युजरने टिप्पणी केली, "जराही सिव्हीक सेन्स नाही". आणखी एका युजरने लिहिले, "अशा लोकांवर कठोर कारवाई होणे गरजेचे आहे जेणेकरुन पुन्हा असे प्रकार घडू नयेत". या सगळ्या प्रतिक्रियांमधून नागरिकांचा संताप स्पष्टपणे दिसून येतो.

या घटनेने पुन्हा एकदा सार्वजनिक ठिकाणी वागण्याच्या पद्धतीबाबत आणि सोसायट्यांमधील सुरक्षा व्यवस्थेबाबत प्रश्न उभे केले आहेत. लिफ्टसारख्या सार्वजनिक जागी सीसीटीव्ही असल्यामुळेच हा प्रकार उघड झाला, मात्र अशा घटना घडूच नयेत यासाठी सोसायट्यांनी अधिक सतर्क राहण्याची गरज असल्याचे मत काही रहिवाशांनी व्यक्त केले आहे. सोसायटीतील सामायिक जागांचा वापर जबाबदारीने व्हावा, अशी अपेक्षाही यानिमित्ताने व्यक्त होत आहे.