एशियन गेम्स 2026: सुजीत कलकलचे कुस्तीत सुवर्ण, फायनलमध्ये कुदियेववर 10-9 ने मात
भारतीय कुस्तीपटू सुजीत कलकलने 2-9 अशा पिछाडीवरून सलग आठ गुण घेत पुरुषांच्या फ्रीस्टाइल 65 किलो गटात सुवर्णपदक जिंकले.
भारतीय कुस्तीपटू सुजीत कलकल याने एशियन गेम्स 2026 (Asian Games 2026) मध्ये कुस्तीतले सुवर्णपदक जिंकले. शुक्रवारी नागोया सिटी इनाए स्पोर्ट्स सेंटरमध्ये पुरुषांच्या फ्रीस्टाइल 65 किलो वजनी गटाची रोमहर्षक फायनल झाली. त्यात त्याने ताजिकिस्तानच्या अब्दुलमजीद कुदियेवचा 10-9 असा पराभव केला. या विजयाने कुस्तीत भारताच्या सुवर्णपदकाच्या प्रतीक्षेला पूर्णविराम मिळाला.
या सामन्यात बराच वेळ 23 वर्षांचा सुजीत 2-9 असा मागे होता. पण सामन्याच्या शेवटच्या क्षणांत त्याने सलग आठ गुण घेतले आणि जबरदस्त पुनरागमन केले. कुदियेवला हरवून त्याने यंदाच्या एशियन गेम्समध्ये भारताला पहिले सुवर्णपदक मिळवून दिले. आइची-नागोयामधील त्याच्या शानदार कामगिरीचा हा निकाल आहे.
फायनलपर्यंतचा त्याचा रस्ता सोपा नव्हता. वाटेत त्याने एका ऑलिम्पिक चॅम्पियनला आणि इराण व जपानसारख्या बलाढ्य प्रतिस्पर्ध्यांना हरवले. पहिल्या फेरीत त्याचा सामना अफगाणिस्तानच्या सैयद उमर झझईशी झाला. सुरुवातीला सुजीत 0-3 असा मागे पडला होता.
त्यानंतर 'पुश आउट' आणि 'शोल्डर थ्रो' यातून गुण घेत त्याने सामन्याचा नूर पालटला आणि 5-3 अशी आघाडी घेतली. मग आणखी एक 'थ्रो' आणि 'रोल' यातून त्याला चार गुण मिळाले. तो सामना त्याने 13-3 असा टेक्निकल श्रेष्ठतेच्या आधारे जिंकला आणि क्वॉर्टर फायनलमध्ये पोहोचला.
क्वॉर्टर फायनलमध्ये त्याच्यासमोर इराणचा अब्बास इब्राहिम देहसावदकोही होता. या सामन्यात सुजीतने एकही गुण गमावला नाही आणि टेक्निकल श्रेष्ठतेच्या आधारे विजय मिळवला.
सेमीफायनलमध्ये मोठे आव्हान होते, कारण जपानचा ऑलिम्पिक विजेता कोटारो कियोका समोर होता. पहिल्या पीरियडच्या शेवटी सुजीत 0-2 ने मागे होता. दुसऱ्या पीरियडमध्ये मात्र त्याने तीन गुण घेतले, तर कियोकाला फक्त एकच गुण मिळवता आला.
सामना 3-3 असा बरोबरीत संपला. तरीही निश्चित नियमांच्या आधारे सुजीतला विजयी ठरवण्यात आले आणि त्याने फायनलमध्ये जागा पक्की केली. तिथे त्याच्यासमोर कुदियेव होता. ताजिकिस्तानचा हा कुस्तीपटू एका क्षणी 9-2 असा पुढे होता. पण सुजीतने हार मानली नाही आणि शेवटच्या क्षणी शानदार विजय मिळवला.
