प्रणवी उर्सने रचला इतिहास, आशियाई स्पर्धेत गोल्फमध्ये सुवर्ण जिंकणारी पहिली भारतीय महिला

आशियाई क्रीडा स्पर्धा २०२६ मध्ये भारताच्या प्रणवी उर्सने महिलांच्या वैयक्तिक गोल्फ स्पर्धेत सुवर्णपदक जिंकून इतिहास रचला. आशियाई स्पर्धेत गोल्फमध्ये वैयक्तिक सुवर्णपदक मिळवणारी ती पहिली भारतीय महिला गोल्फपटू ठरली आहे. या स्पर्धेत भारतीय महिला गोल्फपटूंनी उत्कृष्ट कामगिरी केली.

चार फेऱ्यांच्या या स्पर्धेच्या अंतिम फेरीत प्रणवीने शेवटच्या होलवर पार करत १५ अंडर पारवर मजल मारली. तिने अंतिम फेरीत इव्हन-पार ७० चा स्कोर केला आणि चार दिवसांनंतर तिचा एकूण स्कोर १५-अंडर २६५ झाला. अंतिम फेरीत तिने एका स्ट्रोकची आघाडी कायम ठेवली आणि त्याच जोरावर हा ऐतिहासिक पराक्रम केला.

म्हैसूरची असलेल्या २३ वर्षीय प्रणवीने तिसऱ्या होलवर ट्रिपल बोगी केली होती. त्यानंतर मात्र तिने तीन बर्डीज केल्या. सिंगापूरची शॅनन टॅन आणि चीनची यिन रुओनिंग यांनी १४ अंडर पारवर स्पर्धा संपवली आणि त्यांना संयुक्तपणे रौप्यपदक मिळाले.

वैयक्तिक सुवर्णपदकासोबतच प्रणवीने भारतीय महिला संघाला सांघिक स्पर्धेत रौप्यपदक मिळवून देण्यातही महत्त्वाची भूमिका बजावली. प्रणवी, अदिती अशोक आणि दीक्षा डागर यांच्या संघाने हे रौप्यपदक जिंकले. अंतिम फेरीत अदितीचा स्कोर ६७ होता, तर दीक्षाचा स्कोर ७७ होता. भारताने १४-अंडर ५४६ गुण मिळवले. चीनने २२-अंडर ५३८ गुणांसह सांघिक स्पर्धेत सुवर्णपदक जिंकले.

पुरुषांच्या गोल्फमध्ये भारतासाठी याआधी शिव कपूर यांनी २००२ च्या बुसान गेम्समध्ये सुवर्णपदक जिंकले होते. आता महिलांच्या वैयक्तिक गटात प्रणवीने भारताला आशियाई स्पर्धेतील गोल्फचे सुवर्णपदक मिळवून दिले.

प्रणवी देशातील सर्वात तरुण महिला गोल्फर आहे आणि ती सध्या फक्त २३ वर्षांची आहे. वडील आणि भावाकडून प्रेरणा घेऊन तिने वयाच्या सहाव्या वर्षी गोल्फ खेळायला सुरुवात केली.

२०२३ च्या आशियाई क्रीडा स्पर्धेतही ती भारतीय महिला गोल्फ संघाचा भाग होती. तेव्हा सांघिक स्पर्धेत संघ चौथ्या स्थानावर राहिला आणि तिचे पदक थोडक्यात हुकले. यंदा मात्र तिने सुवर्णपदक जिंकले. २०२६ च्या आशियाई क्रीडा स्पर्धेतील हे भारताचे १८ वे सुवर्णपदक आहे आणि भविष्यात आणखी पदके मिळण्याची शक्यता आहे.