Asian Games 2026: भारताच्या पदक खात्याचा श्रीगणेशा! एलावेनिल-सोनम-विदरसाचा अचूक निशाणा, १० मीटर एअर

आयची-नागोया आशियाई क्रीडा स्पर्धेत भारताच्या पदकतालिकेला सुरुवात झाली ती नेमबाजीतून. या स्पर्धेत भारताने आपल्या पदक मोहिमेला सुरुवात केली आणि भारताला पहिले पदक नेमबाजी स्पर्धेतच मिळाले. महिलांच्या १० मीटर एअर रायफल सांघिक प्रकारात एलावेनिल वलारिवन, सोनम म्हस्कर आणि विदरसा कोचलुमकल या तिघींच्या टीमने रौप्य पदक जिंकले. या स्पर्धेत एकूण १६ संघ उतरले होते, त्यात भारतीय टीमने एकूण १८९७ गुण मिळवत दुसरे स्थान पटकावले. सुवर्णपदक चीनच्या महिला टीमने पटकावले.

चीनने १९०४.२ गुणांचा विश्वविक्रम नोंदवत सुवर्णपदक जिंकले, तर यजमान जपान १८९७.१ गुणांसह तिसऱ्या स्थानावर राहिला. भारत आणि जपानमध्ये अवघ्या ०.१ गुणांचा फरक होता. आशियाई क्रीडा स्पर्धा २०२६ मधील भारताचे हे पहिलेच पदक ठरले. यापूर्वी सुचिका तारियालने एमएमएमध्ये उपांत्य फेरी गाठल्याने भारताचे एक पदक आधीच निश्चित झाले होते.

सहा सीरीजमध्ये भारतीय टीमची कामगिरी अशी राहिली. पहिल्या सीरीजनंतर भारतीय त्रिकुटाने एकूण ३१६.९ गुण मिळवले. दुसऱ्या सीरीजमध्ये संघाने ३१६.८ गुण मिळवले. तिसऱ्या सीरीजमध्ये भारतीय नेमबाजांनी चांगली कामगिरी करत ३१७.९ गुण मिळवले आणि एकूण गुणसंख्या ९५१.६ पर्यंत नेली. चौथ्या सीरीजमध्ये भारताने ३१६.२ गुणांसह एकूण गुणसंख्या १२६७.८ वर नेली. पाचव्या सीरीजमध्ये टीमने ३१४.८ गुण मिळवले, तर शेवटच्या सीरीजमध्ये ३१५.४ गुणांसह एकूण १८९७ गुणांनिशी रौप्य पदकावर शिक्कामोर्तब झाले.

महिलांच्या १० मीटर एअर रायफल वैयक्तिक प्रकारातही एलावेनिल, सोनम आणि विदरसा यांनी चांगली कामगिरी केली. एलावेनिल वलारिवन आणि सोनम म्हस्कर यांनी अंतिम फेरीसाठी पात्रता मिळवली. एकूण ५७ नेमबाजांमध्ये सोनमने ६३४.१ गुणांसह तिसरे स्थान पटकावले, तर एलावेनिलने ६३३.५ गुणांसह सातवे स्थान मिळवले. तिसरी भारतीय नेमबाज विदरसा हिने ६३०.४ गुण मिळवत १२वे स्थान पटकावले, मात्र ती पहिल्याच फेरीत बाद झाली.

अंतिम फेरीत भारतीय १० मीटर एअर रायफल महिला वैयक्तिक प्रकारात एलावेनिल वलारिवनने रौप्य पदकही पटकावले, तर सोनम म्हस्कर सहाव्या स्थानावर राहिली. यामुळे एलावेनिल वलारिवनने अवघ्या काही तासांत भारतासाठी दोन पदके जिंकली. मात्र तिचे सुवर्णपदक केवळ ०.०६ सेकंदांनी हुकले. या दोन्ही निकालांमुळे भारताच्या पदकतालिकेत आता दोन रौप्य पदकांची भर पडली आहे.

एलावेनिलचे हे वैयक्तिक रौप्यपदक आशियाई क्रीडा स्पर्धा २०२६ मधील भारताचे दुसरे पदक ठरले. यापूर्वी एलावेनिल, सोनम आणि विदरसा या त्रिकुटाने महिलांच्या १० मीटर एअर रायफल सांघिक प्रकारात रौप्यपदक जिंकले होते.