आशियाई क्रीडा २०२६: अंतिम सामन्यात अंतिम पंघालला १-९ ने हार, कुस्तीत भारताला रौप्य पदक

आशियाई क्रीडा २०२६ स्पर्धेत भारतीय खेळाडूंचा जलवा कायम आहे. भारताची स्टार महिला कुस्तीपटू अंतिम पंघाल हिने महिलांच्या ५३ किलो वजनी गटातील कुस्ती स्पर्धेत भारतासाठी रौप्य पदक मिळवले आहे. अंतिम सामन्यात तिला जपानच्या माओ कियोका हिच्याकडून १-९ ने हार पत्करावी लागली. त्यामुळे सुवर्ण पदक जिंकण्याची संधी तिच्या हातून गेली.

पंघालने संपूर्ण स्पर्धेत उत्तम कामगिरी करून अंतिम फेरी गाठली होती. पण विजेतेपदाच्या लढतीत ती जपानच्या कुस्तीपटूच्या आव्हानाचा सामना करू शकली नाही. सामन्याच्या पहिल्या सत्रात कियोकाने २-० अशी आघाडी घेतली. या पहिल्या सत्रात पंघालला एकही गुण मिळवता आला नाही.

पंघालने पुनरागमन करण्याचा प्रयत्न केला, पण दुसऱ्या सत्रात तिच्या पायाला दुखापत झाली. या दुखापतीमुळे तिचा त्रास आणखीच वाढला आणि त्याचा फायदा घेत कियोकाने सतत गुण मिळवले. पहिल्या सत्रात २-० अशी आघाडी घेतलेल्या जपानी कुस्तीपटूने दुसऱ्या सत्रातही वर्चस्व गाजवले. तिने ७ गुण मिळवले आणि भारतीय कुस्तीपटूला पुनरागमन करण्याची कोणतीही संधी दिली नाही. अंतिम गुणसंख्या १-९ अशी राहिली आणि पंघालला रौप्य पदकावर समाधान मानावे लागले.

अंतिम फेरीपर्यंतचा पंघालचा प्रवास दमदार होता. तिने ५३ किलो वजनी गटात चांगली कामगिरी करत अंतिम फेरीत प्रवेश केला. उपांत्यपूर्व फेरीत तिने कझाकस्तानच्या शुगायला ओमीरबेक हिला ९-० ने हरवले. त्यानंतर उपांत्यपूर्व फेरीतच तिने उझबेकिस्तानच्या साकिबजमाल एस्बोसिनोवा हिचा ८-० ने पराभव केला. उपांत्य फेरीत पंघालचा सामना चीनच्या झांग जिन हिच्याशी झाला. सुरुवातीची आघाडी गमावल्यानंतरही तिने शानदार पुनरागमन करत ६-१ ने विजय मिळवला आणि अंतिम फेरी गाठली.

पंघालच्या रौप्य पदकामुळे आशियाई क्रीडा २०२६ स्पर्धेत कुस्तीमधील भारताच्या पदकांची संख्या सहा झाली आहे. भारतीय कुस्तीपटूंनी आतापर्यंत या स्पर्धेत दोन सुवर्ण, दोन रौप्य आणि दोन कांस्य पदके जिंकली आहेत. यापूर्वी अमन सेहरावत यांनी पुरुषांच्या ५७ किलो वजनी गटातील स्पर्धेत सुवर्ण पदक जिंकले होते. तसेच सुजीत यांनी पुरुषांच्या ६५ किलो फ्रीस्टाइल प्रकारात सुवर्ण पदक जिंकले होते.

या रौप्य पदकामुळे भारताच्या एकूण पदकांची संख्या ८४ झाली आहे. भारताने आतापर्यंत या स्पर्धेत २० सुवर्ण, २७ रौप्य आणि ३७ कांस्य पदके जिंकली आहेत.