मित्राला पकडून नेताना पाहून श्वान भडकला, डॉग कॅचरवर हल्ला; व्हिडिओ सोशल मीडियावर व्हायरल

सोशल मीडियावर सध्या एका श्वानाच्या मैत्रीचा व्हिडिओ वेगाने व्हायरल होत आहे. श्वान हा सर्वात निष्ठावान प्राणी मानला जातो आणि घराची राखण करण्यासाठी तो घराघरात पाळला जातो. या व्हिडिओत मात्र एक श्वान आपल्या मित्र श्वानाला अडचणीतून सोडवण्यासाठी डॉग कॅचरशी भिडताना दिसतो.

व्हिडिओमध्ये रस्त्याच्या कडेला एक डॉग कॅचर दिसतो. त्याने एका कुत्र्याला मोठ्या जाळ्यात यशस्वीपणे पकडले आहे आणि तो त्याला घेऊन जाण्याचा प्रयत्न करत आहे. आपल्या मित्राला कुठेतरी दूर नेले जात आहे, हे दुसरा श्वान पाहतो आणि तो संतापतो.

मित्राला उचलून नेऊ नये यासाठी हा श्वान आटोकाट प्रयत्न करतो. तो मोठ्या धैर्याने रस्त्यावरच डॉग कॅचरवर तुटून पडतो. तो त्या व्यक्तीवर भुंकतो, त्याच्या पायाचा चावा घेतो आणि त्याला तिथून निघून जायला सांगतो, असे यात दिसते.

व्हिडिओचा शेवट याच दृश्यांसह होतो. त्यामुळे पथकाने त्या श्वानाला मोकळे केले की त्याला सोबत घेऊन गेले, हे अधिकृतपणे स्पष्ट झालेले नाही. तरीही हा व्हिडिओ इंटरनेटवर चांगलाच गाजत आहे.

असे म्हणतात की माणूस एकवेळ विश्वासघात करेल, पण कुत्रा आपला विश्वास कधीही तोडणार नाही. बहुतेक प्राणी आपल्या मालकाशी निष्ठावान असतात. इथे मात्र हा श्वान आपल्या मित्राशी असलेले नातेही पुरेपूर निभावताना दिसला.

हा व्हिडिओ @funny.sudha नावाच्या इंस्टाग्राम अकाऊंटवरून शेअर करण्यात आला आहे. श्वानाची मैत्री पाहून यूजर्स चांगलेच खुश झाले आहेत आणि हा व्हिडिओ मोठ्या प्रमाणात शेअर केला जात आहे. अनेकांनी व्हिडिओतील दृश्यांवर आणि श्वानाच्या मैत्रीवर आपल्या प्रतिक्रिया दिल्या आहेत.

एका यूजरने म्हटले की, "कुत्रा व्यक्तीला म्हणाला असेल माझ्याशी पंगा घेतलास तर मी तुला माफ करेन; पण माझ्या भावाशी पंगा घेतलास, तर मी तुझे लचके तोडेन". दुसऱ्या युजरने लिहिले आहे, "यालाच म्हणतात भावांमधील प्रेम". आणखी एका यूजरने लिहिले आहे, "भाईचारा ऑन टाॅप".

या घटनेची माहिती सोशल मीडियावर शेअर झालेल्या पोस्ट आणि व्हिडिओवर आधारित आहे. त्यातील सर्व दाव्यांची स्वतंत्रपणे पडताळणी झाल्याचे निश्चितपणे सांगता येत नाही.