CRPF मध्ये क्रीडा कोट्यातून ५२१ जागांची भरती; लेखी परीक्षा नाही
CRPF ने क्रीडा कोटा भरती २०२६ अंतर्गत हेड कॉन्स्टेबल आणि कॉन्स्टेबल पदांसाठी ५२१ जागा जाहीर केल्या असून १२ ऑक्टोबरपासून अर्ज सुरू होणार आहेत.
सरकारी नोकरीच्या शोधात असलेल्या खेळाडूंसाठी केंद्रीय राखीव पोलीस दलाकडून म्हणजेच CRPF कडून एक चांगली संधी समोर आली आहे. गृह मंत्रालयाच्या अखत्यारीत येणाऱ्या या दलाने क्रीडा कोटा भरती २०२६ अंतर्गत हेड कॉन्स्टेबल आणि कॉन्स्टेबल या पदांसाठी एकूण ५२१ जागा भरण्याचे जाहीर केले आहे. ही भरती २२ वेगवेगळ्या क्रीडा प्रकारांत प्राविण्य मिळवलेल्या पुरुष आणि महिला खेळाडूंसाठी असणार आहे.
अर्ज करण्याची प्रक्रिया १२ ऑक्टोबर २०२६ पासून सुरू होईल आणि उमेदवारांना ११ नोव्हेंबर २०२६ रोजी रात्री ११:५९ वाजेपर्यंत ऑनलाइन अर्ज भरता येणार आहे. अर्ज फक्त CRPF च्या अधिकृत वेबसाइटवरूनच करावा लागेल.
५२१ जागांपैकी हेड कॉन्स्टेबल पदासाठी १८२ जागा असून त्यात १५० पुरुष आणि ३२ महिलांचा समावेश आहे. या पदासाठी अर्ज करणारा उमेदवार बारावी पास असणे गरजेचे आहे. कॉन्स्टेबल पदासाठी ३३९ जागा असून त्यात २५८ पुरुष आणि ८१ महिलांचा समावेश आहे, आणि इथे उमेदवार दहावी पास असणे आवश्यक आहे. उमेदवारांची ही शैक्षणिक पात्रता ११ नोव्हेंबर २०२६ पर्यंत पूर्ण झालेली असावी.
क्रीडा अर्हतेबाबत बोलायचं झालं तर हेड कॉन्स्टेबल पदासाठी मान्यताप्राप्त आंतरराष्ट्रीय स्पर्धेत देशाचे प्रतिनिधित्व केलेले खेळाडू, किंवा नॅशनल गेम्स अथवा राष्ट्रीय चॅम्पियनशिपमध्ये पदक अथवा तिसरे स्थान मिळवलेले खेळाडू पात्र ठरतील. याशिवाय इंटर युनिव्हर्सिटी स्पर्धेत वैयक्तिक प्रकारात पहिले किंवा दुसरे स्थान मिळवणारे आणि ज्युनियर नॅशनलमध्ये सुवर्ण किंवा रौप्य पदक जिंकलेले खेळाडूही अर्ज करू शकतात. कॉन्स्टेबल पदासाठी सीनियर किंवा ज्युनियर नॅशनल स्पर्धेत राज्याचे प्रतिनिधित्व केलेले, नॅशनल स्पोर्ट्स गेम्स फॉर स्कूल्स आणि खेलो इंडिया युनिव्हर्सिटी, युथ किंवा विंटर गेम्समध्ये विजेते ठरलेले, तसेच इंटर युनिव्हर्सिटी स्पर्धेत विद्यापीठाचे प्रतिनिधित्व केलेले खेळाडू पात्र आहेत. या कामगिरीचा कालावधी ३० सप्टेंबर २०२४ ते ३० सप्टेंबर २०२६ या दरम्यानचा असावा.
दोन्ही पदांसाठी वयोमर्यादा १८ ते ३० वर्षे इतकी ठेवण्यात आली आहे आणि ही गणना १ ऑगस्ट २०२६ नुसार केली जाईल. म्हणजेच उमेदवाराचा जन्म २ ऑगस्ट २००३ पूर्वी किंवा १ ऑगस्ट २००८ नंतर नसावा. वयोमर्यादेत सूट देताना सामान्य प्रवर्गाला ५ वर्षे, ओबीसी प्रवर्गाला ८ वर्षे आणि एससी-एसटी प्रवर्गाला १० वर्षांची सूट मिळणार आहे.
वेतनाबाबत सांगायचं तर हेड कॉन्स्टेबल पदासाठी पे लेव्हल ४ नुसार Rs २५,५०० ते Rs ८१,१०० इतके वेतन मिळेल, तर कॉन्स्टेबल पदासाठी पे लेव्हल ३ नुसार Rs २१,७०० ते Rs ६९,१०० इतके वेतन दिले जाईल. अर्ज शुल्काबाबत ओपन, ओबीसी आणि ईडब्ल्यूएस प्रवर्गातील पुरुष उमेदवारांना Rs १०० भरावे लागतील, तर महिला, एससी, एसटी आणि माजी सैनिकांना शुल्कातून पूर्ण सूट देण्यात आली आहे.
या भरतीसाठी कोणतीही लेखी परीक्षा घेतली जाणार नाही. निवड प्रक्रियेत कागदपत्र पडताळणी, शारीरिक मानक चाचणी व स्पोर्ट्स ट्रायल आणि वैद्यकीय तपासणी असे टप्पे असतील. शारीरिक निकषांनुसार पुरुष उमेदवारांची उंची किमान १७० सेमी आणि महिला उमेदवारांची किमान १५७ सेमी असावी लागेल. पुरुष उमेदवारांच्या छातीबाबत न फुगवता ८० सेमी आणि फुगवल्यावर किमान ५ सेमी वाढ अनिवार्य आहे. नियमांनुसार काही विशिष्ट प्रवर्गांना या शारीरिक निकषांत सूट दिली जाईल.
अर्ज करण्यासाठी उमेदवारांनी CRPF च्या अधिकृत भरती संकेतस्थळाला भेट देऊन आपल्या क्रीडा प्राविण्याचे प्रमाणपत्र अपलोड करायचे आहे, ऑनलाइन फॉर्ममध्ये वैयक्तिक व क्रीडाविषयक माहिती अचूक भरायची आहे, लागू असल्यास Rs १०० अर्ज शुल्क भरायचे आहे आणि शेवटी अर्ज सबमिट करून त्याची प्रिंटआउट काढून सुरक्षित ठेवायची आहे.
