चंद्रपुरात ज्वेलर्स मालकावर धारदार शस्त्राने हल्ल्याचा प्रयत्न, आरोपी CCTV मध्ये दिसला

चंद्रपूर :- चंद्रपूरच्या मुख्य सराफा बाजारात एका ज्वेलर्स मालकावर धारदार शस्त्राने हल्ल्याचा प्रयत्न झाल्याने शहरात खळबळ उडाली आहे. ही घटना बुधवारी, २१ ऑक्टोबरला संध्याकाळी सुमारे ६:४० वाजता घडली. दुकानाच्या काचेमुळे मालक बचावले, तर आरोपी शेजारच्या दुकानातील सीसीटीव्हीत कैद झाला आहे.

मिळालेल्या माहितीनुसार, चंद्रपूर शहर पोलीस स्टेशनसमोर असलेल्या नूतन स्वर्ण कला केंद्रात (आस ज्वेलर्स) एक तरुणी काम करते. परिसरातील कपड्याच्या दुकानात काम करणाऱ्या एका युवकाची तिच्यावर नजर होती, असे सांगितले जाते. बुधवारी त्या युवकाने तरुणीची छेड काढण्याचा प्रयत्न केल्याचा आरोप आहे.

या प्रकाराने घाबरलेल्या तरुणीने ज्वेलर्सच्या मालकाला सगळी माहिती दिली. तिची अडचण पाहून मालकाने त्या युवकाला बोलावून चांगलेच सुनावले होते.

तक्रारीनुसार, मालकाने सुनावल्याच्या रागातून तो युवक काही वेळाने बदला घेण्याच्या उद्देशाने परत आला, असे सांगितले जाते. संध्याकाळी सुमारे ६:४० वाजता त्याने धारदार शस्त्राने मालकावर हल्ला करण्याचा प्रयत्न केला. मात्र दुकानाच्या काचेमुळे त्याचा वार यशस्वी होऊ शकला नाही आणि व्यावसायिक या प्राणघातक हल्ल्यापासून बचावले.

अचानक घडलेल्या या प्रकारामुळे परिसरात खळबळ उडाली. लोकांचा ओरडा ऐकून आरोपी तिथून पळून गेला. पळून जात असताना तो शेजारच्या दुकानातील सीसीटीव्ही कॅमेऱ्यात कैद झाला आहे.

चंद्रपूर शहराचा मुख्य सराफा बाजार पोलीस स्टेशनच्या अगदी समोर आहे. अशा संवेदनशील आणि गर्दीच्या भागात धारदार शस्त्राने हल्ल्याचा प्रयत्न झाल्यामुळे व्यापाऱ्यांच्या सुरक्षेवर मोठे प्रश्नचिन्ह निर्माण झाले आहे. तरुणीला मदत करणाऱ्या व्यावसायिकालाच लक्ष्य करण्याचा प्रयत्न झाल्याने बाजारातील व्यापाऱ्यांमध्ये दहशत आणि रोषाचे वातावरण आहे.

शहर पोलिसांनी आरोपीच्या शोधासाठी वेगवेगळी पथके नेमली असल्याचे सांगितले जात आहे. आता सीसीटीव्ही फुटेजच्या आधारे पोलीस आरोपीला किती लवकर अटक करतात आणि मुख्य सराफा बाजारात व्यापाऱ्यांची सुरक्षा सुनिश्चित करण्यासाठी काय पावले उचलतात, हे पाहणे महत्त्वाचे ठरणार आहे.