चंद्रपुरातील चौकांत होमगार्ड पुन्हा नेमा; मुनगंटीवार यांची पोलीस अधीक्षकांकडे मागणी

चंद्रपूर शहरातील प्रमुख चौकांमध्ये वाहतूक सांभाळणाऱ्या होमगार्ड जवानांची पूर्वीप्रमाणे तातडीने पुन्हा नेमणूक करावी, अशी मागणी आमदार सुधीर मुनगंटीवार यांनी केली आहे. यासाठी त्यांनी चंद्रपूरचे जिल्हा पोलीस अधीक्षक यांना पत्र लिहिले आहे.

मुनगंटीवार यांच्या म्हणण्यानुसार, चंद्रपूर महानगरातील वाहतूक सुरळीत राहावी आणि वाहनांची कोंडी होऊ नये, म्हणून याआधी प्रमुख चौकांमध्ये वाहतूक नियंत्रणासाठी होमगार्ड जवान नेमले गेले होते. त्यांच्या नियोजनबद्ध उपस्थितीमुळे शहराच्या वाहतुकीला शिस्त लागली होती. मात्र गेल्या काही दिवसांपासून विविध चौकांत नेमलेले हे जवान कर्तव्यावर दिसत नाहीत. त्यामुळे वाहतूक नियंत्रणाचा प्रश्न निर्माण झाला आहे.

याचा परिणाम म्हणून प्रमुख चौकांमध्ये वाहतूक अस्ताव्यस्त होत आहे. वाहनचालकांना तसेच पादचाऱ्यांना त्रास सहन करावा लागत आहे. वाहतूक कोंडीमुळे अपघातांची शक्यता नाकारता येत नाही, असेही त्यांनी पत्रात नमूद केले आहे.

शहरातील प्रमुख चौकांमध्ये होमगार्ड जवान वाहतुकीचे नियमन करतात, वाहनांना शिस्त लावतात, कोंडी होऊ देत नाहीत आणि पादचाऱ्यांना सुरक्षितपणे रस्ता ओलांडण्यास मदत करतात. या जबाबदाऱ्या ते प्रामाणिकपणे पार पाडतात. त्यांच्या उपस्थितीमुळे वाहतुकीला शिस्त लागते आणि नागरिकांना मोठा दिलासा मिळतो, असे मुनगंटीवार यांचे म्हणणे आहे.

होमगार्ड जवान हे केवळ वाहतूक नियमन करणारे कर्मचारी नाहीत, तर शहराच्या रोजच्या सार्वजनिक व्यवस्थेचा एक महत्त्वाचा आधारस्तंभ आहेत, असे त्यांनी अधोरेखित केले. कडक ऊन असो किंवा पावसाचा मारा, रस्त्यांवर वाढलेली वाहनांची वर्दळ असो किंवा सण-उत्सवांच्या काळातील गर्दी, प्रत्येक परिस्थितीत हे जवान आपले कर्तव्य बजावत असतात. त्यांच्या दक्षतेमुळे वाहतुकीला दिशा मिळते, नागरिकांचा वेळ वाचतो आणि रस्त्यांवरील सुरक्षिततेला बळ मिळते. म्हणूनच त्यांच्या सेवेचे महत्त्व लक्षात घेऊन वाहतूक नियंत्रणासाठी त्यांची नियमित उपस्थिती निश्चित करणे आवश्यक आहे, असे ते म्हणाले.

या पार्श्वभूमीवर चंद्रपूर महानगरातील सर्व प्रमुख चौकांमध्ये होमगार्ड जवानांची पूर्वीप्रमाणे तात्काळ पुन्हा नेमणूक व्हावी, अशी मागणी त्यांनी पोलीस अधीक्षकांकडे केली आहे. या जवानांच्या माध्यमातून नियमितपणे वाहतूक संचालनाचे काम व्हावे आणि शहरातील वाहतूक शिस्तबद्ध राहावी, अशी अपेक्षा त्यांनी व्यक्त केली आहे.

शहराच्या सुरक्षिततेसाठी होमगार्ड जवानांचे योगदान अनिवार्य आहे, असे सांगून मुनगंटीवार म्हणाले की, त्यांच्या कर्तव्यदक्ष सेवेचा योग्य उपयोग करून घेणे ही प्रशासनाचीही जबाबदारी आहे. त्यामुळे या मागणीची गांभीर्याने दखल घेऊन संबंधित विभागाने तातडीने कार्यवाही करावी, असे आवाहनही आमदार सुधीर मुनगंटीवार यांनी केले आहे.