चंद्रपुरातील चौकांमध्ये होमगार्ड पुन्हा तैनात करा, मुनगंटीवार यांचे पोलीस अधीक्षकांना पत्र

चंद्रपूर शहरातील प्रमुख चौकांमध्ये होमगार्ड जवानांची पूर्वीप्रमाणे तात्काळ पुनर्नियुक्ती करावी, अशी मागणी आमदार सुधीर मुनगंटीवार यांनी केली आहे. यासाठी त्यांनी चंद्रपूरचे जिल्हा पोलीस अधीक्षक यांना पत्र लिहिले आहे. वाहतूक कोंडी, अपघातांचा धोका आणि नागरिकांची गैरसोय टाळण्यासाठी होमगार्ड जवानांची भूमिका अत्यंत महत्त्वाची असल्याने नियमित वाहतूक नियमनासाठी तातडीने कार्यवाही व्हावी, असे आवाहनही त्यांनी केले आहे.

मुनगंटीवार यांच्या म्हणण्यानुसार, शहरातील वाहतूक सुरळीत ठेवण्यात आणि नागरिकांचा प्रवास सुरक्षित करण्यात होमगार्ड जवानांचा मोलाचा वाटा आहे. प्रमुख चौकांमध्ये वाहतुकीचे नियमन करणे, वाहनचालकांना शिस्त लावणे, कोंडी होऊ न देणे आणि पादचाऱ्यांना सुरक्षितपणे रस्ता ओलांडायला मदत करणे, ही कामे हे जवान प्रामाणिकपणे करतात. त्यांच्या उपस्थितीमुळे वाहतुकीला शिस्त लागते आणि नागरिकांना मोठा दिलासा मिळतो.

पत्रात मुनगंटीवार यांनी सांगितले आहे की, चंद्रपूर महानगरातील प्रमुख चौकांमध्ये वाहतूक सुरळीत राहावी आणि वाहनांची कोंडी होऊ नये, म्हणून यापूर्वी वाहतूक नियंत्रणासाठी होमगार्ड जवानांची नेमणूक करण्यात आली होती. ठरवून लावलेल्या त्या उपस्थितीमुळे शहराच्या वाहतुकीला शिस्त आली होती. मात्र गेल्या काही दिवसांपासून शहरातील विविध चौकांत नेमलेले होमगार्ड जवान कामावर दिसत नाहीत. त्यामुळे वाहतूक कोण सांभाळणार, हा प्रश्न उभा राहिला आहे.

याचा परिणाम म्हणून प्रमुख चौकांमध्ये वाहतुकीची अस्ताव्यस्त स्थिती निर्माण होत आहे. वाहनचालकांसह पादचाऱ्यांनाही त्रास सहन करावा लागत आहे. वाहतूक कोंडीमुळे अपघातांची शक्यता नाकारता येत नाही, असेही त्यांनी नमूद केले आहे.

होमगार्ड जवान हे फक्त वाहतूक नियंत्रित करणारे कर्मचारी नाहीत, तर शहराच्या रोजच्या सार्वजनिक व्यवस्थेचा एक महत्त्वाचा आधारस्तंभ आहेत, असे मुनगंटीवार यांनी अधोरेखित केले. कडक ऊन असो वा पावसाचा मारा, रस्त्यांवर वाहनांची वर्दळ वाढलेली असो किंवा सण-उत्सवांच्या काळातील गर्दी असो, प्रत्येक परिस्थितीत हे जवान आपले कर्तव्य बजावतात. त्यांच्या दक्षतेमुळे वाहतुकीला दिशा मिळते, नागरिकांचा वेळ वाचतो आणि रस्त्यांवरील सुरक्षितता वाढते. म्हणूनच त्यांच्या सेवेचे महत्त्व लक्षात घेऊन शहरातील वाहतूक नियंत्रणासाठी त्यांची नियमित उपस्थिती निश्चित करणे गरजेचे आहे, असे त्यांचे म्हणणे आहे.

या पार्श्वभूमीवर सर्व प्रमुख चौकांमध्ये होमगार्ड जवानांची पूर्वीप्रमाणे तात्काळ पुनर्नियुक्ती व्हावी, अशी मागणी त्यांनी जिल्हा पोलीस अधीक्षकांकडे केली आहे. या जवानांमार्फत नियमितपणे वाहतुकीचे संचालन व्हावे आणि शहराची वाहतूक शिस्तबद्ध राहावी, अशी अपेक्षा त्यांनी व्यक्त केली आहे.

शहराच्या सुरक्षिततेसाठी होमगार्ड जवानांचे योगदान अनिवार्य आहे, असे सांगून मुनगंटीवार म्हणाले की, कर्तव्यदक्ष जवानांच्या सेवेचा योग्य वापर करून घेणे ही प्रशासनाचीही जबाबदारी आहे. त्यामुळे या मागणीची गांभीर्याने दखल घेऊन संबंधित विभागाने तातडीने कार्यवाही करावी, असे आवाहन त्यांनी केले आहे.