टाटा मुंबई मॅरेथॉन जगात 21 व्या स्थानी, आर्थिक प्रभावाच्या पुरस्कारानेही गौरव

टाटा मुंबई मॅरेथॉनने जागतिक पातळीवर आपला ठसा उमटवला आहे. ब्रँड फायनान्सच्या 'मॅरेथॉन्स टॉप 50' (2026) या अहवालात जगातील अव्वल 50 मॅरेथॉन ब्रँड्समध्ये या स्पर्धेला 21 वे स्थान मिळाले आहे. ही स्पर्धा प्रोकॅम इंटरनॅशनल आयोजित करते. एवढेच नव्हे, तर 'स्ट्रॉंगेस्ट इकॉनॉमिक इम्पॅक्ट - इमर्जिंग मार्केट्स' या प्रतिष्ठेच्या पुरस्कारानेही टाटा मुंबई मॅरेथॉनला गौरविण्यात आले आहे. या दुहेरी यशामुळे मुंबई मॅरेथॉनचे जागतिक महत्त्व अधोरेखित झाले आहे.

ब्रँड फायनान्स ही जगातील आघाडीची ब्रँड व्हॅल्युएशन कन्सल्टन्सी आहे. मॅरेथॉन स्पर्धांची ब्रँड ताकद, त्यांची लोकप्रियता तसेच त्यांचे आर्थिक आणि सामाजिक योगदान यांचा अभ्यास करून तिने हा अहवाल प्रसिद्ध केला. या अभ्यासात भारत, अमेरिका, ब्रिटन, जर्मनी, फ्रान्स, कॅनडा, ब्राझील, जपान आणि ऑस्ट्रेलिया या नऊ देशांतील 75 हून अधिक मॅरेथॉन स्पर्धांचे मूल्यमापन करण्यात आले.

अहवालानुसार, जगातील आघाडीच्या 50 मॅरेथॉन स्पर्धांमुळे 2025 मध्ये त्यांच्या यजमान शहरांत सुमारे सहा अब्ज अमेरिकी डॉलरचा आर्थिक प्रभाव निर्माण झाला. मॅरेथॉनचा फायदा फक्त क्रीडा क्षेत्राला होतो असे नाही. पर्यटन, हॉटेल व्यवसाय, आदरातिथ्य, किरकोळ विक्री आणि स्थानिक व्यवसायांनाही त्यामुळे मोठी चालना मिळते. म्हणूनच अशा स्पर्धा शहरांच्या आर्थिक आणि सामाजिक विकासात महत्त्वाची भूमिका बजावतात, असे अहवालात नमूद केले आहे.

प्रोकॅम इंटरनॅशनलचे सहव्यवस्थापकीय संचालक विवेक सिंग म्हणाले की, मॅरेथॉन आता नुसत्या धावण्याच्या स्पर्धा राहिलेल्या नाहीत. सामूहिक सहभाग, शहराचा अभिमान आणि आर्थिक विकास यांचे प्रभावी माध्यम त्या बनल्या आहेत. स्थानिक पातळीवर विकसित झालेली क्रीडा स्पर्धा जागतिक स्तरावर कशी पोहोचू शकते, हे टाटा मुंबई मॅरेथॉनने दाखवून दिले आहे. या पुरस्कारामुळे भारतातील धावण्याच्या चळवळीला आणखी बळ मिळेल, असेही ते म्हणाले.

टाटा सन्सचे कॉर्पोरेट ब्रँड आणि मार्केटिंग प्रमुख आद्रिऑन टेरॉन यांनीही या यशाचे स्वागत केले. टाटा मुंबई मॅरेथॉन ही मुंबईची जिद्द, गतिमानता आणि सर्वसमावेशकता यांचे प्रतीक आहे, असे त्यांनी सांगितले. या स्पर्धेमुळे वेगवेगळ्या वयोगटांतील नागरिक एकत्र येतात, तसेच आंतरराष्ट्रीय क्रीडा स्पर्धांचे प्रमुख केंद्र म्हणून मुंबईची ओळख अधिक पक्की होत आहे, असेही त्यांनी नमूद केले.

टीसीएसच्या ग्लोबल हेड - स्पोर्ट्स स्पॉन्सरशिप्स मिशेल टेलर यांनी मॅरेथॉनचे महत्त्व अधोरेखित केले. खेळाच्या माध्यमातून समुदायांना एकत्र आणणे आणि लोकांना निरोगी जीवनशैलीकडे वळण्याची प्रेरणा देणे, याचे टाटा मुंबई मॅरेथॉन हे उत्तम उदाहरण आहे, असे त्या म्हणाल्या.

आयडीएफसी फर्स्ट बँकेचे मुख्य विपणन अधिकारी श्रीपाद शेंडे यांच्या म्हणण्यानुसार, मॅरेथॉन ही फक्त स्पर्धा नाही. प्रत्येकाच्या वैयक्तिक ध्येयाचा आणि जिद्दीचा तो प्रवास आहे. ही स्पर्धा निरोगी जीवनशैलीला प्रोत्साहन देते आणि समाजातील वेगवेगळ्या घटकांना एकत्र आणते, असेही त्यांनी नमूद केले.

ब्रँड फायनान्सचे स्पोर्ट्स सर्व्हिसेस प्रमुख स्कॉट मोअर यांनी भारतातील मॅरेथॉन संस्कृतीच्या वाढत्या प्रभावाचे कौतुक केले. टाटा मुंबई मॅरेथॉनने देशातील धावण्याच्या संस्कृतीला आणि क्रीडा क्षेत्रातील गुंतवणुकीला चालना दिली आहे, असे ते म्हणाले. अशा स्पर्धांमुळे सहभाग वाढतो, व्यावसायिक गुंतवणूक आकर्षित होते आणि यजमान शहरांसाठी आर्थिक मूल्य निर्माण होते, असे त्यांनी स्पष्ट केले.

टाटा मुंबई मॅरेथॉनला मिळालेली ही आंतरराष्ट्रीय मान्यता मुंबईच्या क्रीडा क्षेत्रासाठी महत्त्वाचा टप्पा आहे. धावण्याच्या स्पर्धा फक्त एका दिवसापुरत्या मर्यादित राहत नाहीत. शहराच्या आर्थिक, सामाजिक आणि सांस्कृतिक विकासातही त्या महत्त्वपूर्ण योगदान देऊ शकतात, हे या पुरस्काराने अधोरेखित केले आहे.