कर्जतच्या वृक्षतोडीवरून संजय राऊत संतापले, निकमांच्या समर्थनावर सडकून टीका

रायगड जिल्ह्यातील कर्जत तालुक्यात टोरंट पॉवर कंपनीचा जलविद्युत ऊर्जा साठवण प्रकल्प प्रस्तावित आहे. त्यावरून राजकीय वातावरण चांगलंच तापलं आहे. या प्रकल्पासाठी मोठ्या प्रमाणात झाडं तोडली जात असल्याचा आरोप करत विरोधक आणि पर्यावरणप्रेमींनी सरकारवर हल्ला चढवला आहे. कर्जतमधील सायडोंगर आणि पाली खलाटी भागातल्या जंगलात झाडांची कत्तल सुरू असल्याचं स्थानिक ग्रामस्थ आणि पर्यावरणप्रेमी सांगत आहेत.

अशा वेळी ज्येष्ठ विधिज्ञ, विशेष सरकारी वकील आणि भाजपचे खासदार ॲड. उज्ज्वल निकम यांनी कर्जत पंप स्टोरेज प्रकल्प पर्यावरणाला पूरक असल्याचं मत मांडलं. या प्रकल्पाची वस्तुस्थितीही त्यांनी मांडली. निकम यांनी वृक्षतोडीचं समर्थन केल्यानंतर ठाकरे गटाचे नेते आणि खासदार संजय राऊत यांनी संताप व्यक्त केला.

मंगळवारी (२७ तारखेला) माध्यमांशी बोलताना राऊत म्हणाले की, निकम यांच्याबद्दल आम्हाला आदर आहे, ते आमचे मित्र आहेत. पण एका खासदारकीसाठी त्यांनी अब्रूची लक्तरे काढली आहेत. त्यांच्या म्हणण्यानुसार दहा झाडं म्हणजे एक कसाब आहे, आणि झाडं व कसाब यांना आम्ही एकाच तागडीत तोलतो.

राऊत यांनी सांगितलं की, पहिल्या टप्प्यातच ३३,००० झाडं तोडली जाणार आहेत, म्हणजे संपूर्ण जंगलच नष्ट होणार. तिथून भीमाशंकर वाईल्ड लाईफ वीस किलोमीटरवर आहे. या जंगलात आदिवासी राहतात आणि जल, जमीन, जंगल ही त्यांची प्रॉपर्टी आहे, असं ते म्हणाले. नरेंद्र मोदी "एक पेड माँ के नाम" म्हणतात, मग कातकऱ्यांनी लावलेल्या झाडांना आई नाही का, असा सवाल त्यांनी केला. स्थानिकांनी सांगितल्यानुसार डोंगरात साप, विंचू चावल्यावर किंवा दम्यावर विष उतरवणाऱ्या अनेक वनस्पती आहेत आणि पिढ्यानपिढ्या त्यांचा वापर करून लोकांचे जीव वाचवले जातात.

राऊत यांचा आरोप आहे की, देवेंद्र फडणवीस यांनी गुजरातच्या कुणा मेहता, शहा यांच्या टोरंट कंपनीला परवानगी दिली आणि सगळं जंगल त्यांच्या ताब्यात दिलं. रायगड जिल्ह्यातून हजारो पोलीस ग्रामस्थांना मारण्यासाठी तिथे आणले आहेत, असंही ते म्हणाले. आदित्य ठाकरे यांच्याशी आणि गावकऱ्यांशी बोलणं झालं असून, राज ठाकरे उद्या तिथे जाणार आहेत. देशभरातील निसर्गप्रेमी आणि पर्यावरणवाद्यांनी संपर्क केला आहे, ते तिथे येतील, असं राऊत यांनी सांगितलं.

हा प्रकल्प साठ वर्षांचा असेल आणि वन्यजीव संवर्धन केलं जाईल, असं टोरंट कंपनीने स्पष्ट केलं आहे. त्यावर राऊत म्हणाले की, दोनशे-तीनशे वर्षांची झाडं तोडून रोपं कुठे लावणार, जागा आहे कुठे? आरेमध्ये तीन हजार झाडं तोडली, तिथल्या वन्यजीवांचं काय झालं हे कुणी पाहिलं का, असा प्रश्न त्यांनी विचारला. तिथे भूकंपाची शक्यता वर्तवली गेली आहे, असंही त्यांनी म्हटलं.

उद्योगांबद्दल बोलताना राऊत म्हणाले की, महाराष्ट्रात उद्योग यायला हवेत आणि यशवंतराव चव्हाणांच्या काळापासून ते येत आहेत. मुंबईत ३५० गिरण्या होत्या, हे फडणवीस आणि मोदींनी आणलेले उद्योग नव्हते. चंद्रपूर आणि गडचिरोलीत अदानीसाठी सुमारे पाच हजार झाडं तोडली जाणार असल्याचा उल्लेख करून ते म्हणाले की, आम्हाला टाटा, बिर्ला, किर्लोस्कर, महिंद्र हवेत, पण असे अदानी नको. माजी वनमंत्री सुधीर मुनगंटीवार यांनी आंदोलन उभं करावं, आम्ही येतो, असंही राऊत यांनी सांगितलं.