सोनगावात हातभट्टी उद्ध्वस्त; १०० लिटर कच्चे रसायन जप्त, एक संशयित ताब्यात

बारामती तालुका पोलिसांनी अवैध दारू व्यवसायाविरोधात धडक कारवाई करत सोनगाव येथील पारधी वस्ती परिसरात सुरू असलेली हातभट्टी उद्ध्वस्त केली आहे. या कारवाईत गावठी दारू गाळण्यासाठी वापरले जाणारे मोठ्या प्रमाणावरील साहित्य आणि सुमारे १०० लिटर कच्चे रसायन (वॉश) पोलिसांनी जप्त केले.

या प्रकरणात पोलिसांनी एका संशयित आरोपीला ताब्यात घेतले आहे. त्याच्याविरुद्ध महाराष्ट्र दारूबंदी कायद्यानुसार गुन्हा दाखल करण्याची प्रक्रिया सुरू करण्यात आली आहे. कारवाईदरम्यान ताब्यात घेतलेल्या या आरोपीविरोधात पुढील कायदेशीर कारवाई सुरू असल्याचेही सांगण्यात आले.

२८ ऑक्टोबर २०२६ रोजी बारामती तालुका पोलीस ठाण्याचे पोलीस निरीक्षक नारायण पवार यांना सोनगाव येथील पारधी वस्तीमध्ये अवैध हातभट्टी सुरू असल्याची माहिती मिळाली. त्या माहितीच्या आधारे पोलिसांनी आपल्या पथकासह संबंधित ठिकाणी छापा टाकला.

छाप्याच्या वेळी गावठी दारू तयार करण्यासाठी वापरली जाणारी भट्टी, कच्चे रसायन आणि इतर साहित्य पोलिसांना आढळून आले. पोलिसांनी घटनास्थळावर असलेले रसायन तिथेच नष्ट केले आणि हातभट्टी उद्ध्वस्त केली. या व्यवसायातून परिसरात अवैध दारूची निर्मिती आणि विक्री केली जात असल्याचा संशय आहे.

उपविभागीय पोलीस अधिकारी यांच्या मार्गदर्शनाखाली पोलीस निरीक्षक नारायण पवार आणि त्यांच्या पथकाने ही कारवाई केली. या पथकात पोलीस उपनिरीक्षक शिंदे, हेड कॉन्स्टेबल पवार, देशमाने, खरातडे, खटके, वाघमारे कदम, खैरे, पोमणे, तरंगे आणि कांबळे यांच्यासह पथकातील इतर कर्मचाऱ्यांचाही सहभाग होता.

पोलिसांसोबतच राज्य उत्पादन शुल्क विभागाच्या बारामती पथकानेही या कारवाईत भाग घेतला. विभागाचे उपअधीक्षक गणेश कसरे, निरीक्षक देवदत्त पोटे आणि दुय्यम निरीक्षक सागर साबळे यांच्यासह गिरीश कुमार करचे, मनोज होलेम, प्रदीप झुंजुरके, मयूर गाडे, दिनेश ठाकूर, प्रदीप मोहिते, प्रणव मेहता, शितल शिंदे, सुनील वाघ, दिनेश सूर्यवंशी, विनोद शिंदे, विनोद इंजे, चरण कुंठे आणि अन्य कर्मचाऱ्यांनी कारवाईत सहभाग नोंदवला.

बारामती तालुका पोलीस आणि राज्य उत्पादन शुल्क विभाग यांनी एकत्रितपणे केलेल्या या कारवाईमुळे अवैध हातभट्टी चालवणाऱ्यांचे धाबे दणाणले आहेत. परिसरात अवैध दारूची निर्मिती आणि विक्री करणाऱ्यांविरोधात यापुढेही कठोर कारवाई सुरू राहील, असा इशारा पोलिसांनी दिला आहे.