कैलास नगरला महिन्यांपासून पाणी नाही; सरोज राय नागरिकांसह केडीएमसी कार्यालयात

कल्याण पूर्वेतील कैलास नगर परिसरात गेल्या अनेक महिन्यांपासून पाण्याचा गंभीर प्रश्न निर्माण झाला आहे. इथे नियमित पाणीपुरवठा होत नाही, आणि जो होतो तोही पुरेसा नसतो. त्यामुळे स्थानिक रहिवाशांना रोजच्या गरजा भागवताना मोठ्या अडचणींना तोंड द्यावे लागत आहे.

नागरिकांनी याबाबत वारंवार तक्रारी केल्या. तरीही पाण्याचा प्रश्न मार्गी लागलेला नाही. त्यामुळे प्रशासनाविरोधात लोकांची नाराजी दिवसेंदिवस वाढत चालली आहे.

या पार्श्वभूमीवर कल्याण-डोंबिवली महानगरपालिकेच्या (केडीएमसी) ई प्रभाग समितीच्या सभापती आणि भाजपच्या नगरसेविका सरोज राय स्थानिक नागरिकांना बरोबर घेऊन केडीएमसीच्या 'ड' प्रभाग कार्यालयात पोहोचल्या. तिथे त्यांनी संबंधित अधिकाऱ्यांना घेराव घातला आणि कैलास नगरमधील पाणीटंचाईबद्दल जाब विचारला. नागरिकांना भेडसावणाऱ्या अडचणींकडे तातडीने लक्ष द्यावे आणि पाणीपुरवठा सुरळीत करावा, अशी मागणी त्यांनी केली.

कैलास नगरमधील रहिवाशांचा आरोप असा आहे की, वारंवार तक्रारी करूनही ठोस उपाययोजना झालेल्या नाहीत. पाणीपुरवठ्याच्या समस्येवर अधिकाऱ्यांकडून समाधानकारक उत्तरे मिळत नसल्याने नागरिकांनी तीव्र नाराजी व्यक्त केली. अनेक महिन्यांपासून पाण्यासाठी झगडावे लागत असल्याने प्रशासनाने या प्रश्नाकडे गांभीर्याने पाहावे, अशी मागणीही यावेळी करण्यात आली.

विशेष म्हणजे, कल्याण-डोंबिवली महानगरपालिकेत शिवसेना आणि भाजपची सत्ता आहे. तरीही कैलास नगरमधील पाण्याचा प्रश्न कायम असल्याने या मुद्द्यावर राजकीय चर्चा सुरू झाली आहे. सत्ताधारी भाजपचे स्थानिक पदाधिकारी आणि कार्यकर्ते यांच्यातही नाराजी असल्याचे चित्र आहे.

सत्तेत असूनही लोकांना मूलभूत सुविधेसाठी संघर्ष करावा लागत आहे आणि सत्ताधारी पक्षातील लोकप्रतिनिधींनाच नागरिकांच्या पाणीसमस्येसाठी अधिकाऱ्यांकडे धाव घ्यावी लागत आहे. त्यामुळे महापालिका प्रशासनाच्या कामकाजाच्या पद्धतीवर प्रश्न उपस्थित केले जात आहेत.

आता सरोज राय यांनी मांडलेल्या या प्रश्नावर केडीएमसी प्रशासन कोणती उपाययोजना करते, याकडे नागरिकांचे लक्ष लागले आहे. सत्ताधारी पक्षाचे वरिष्ठ पदाधिकारी याबाबत काय भूमिका घेतात, तेही पाहावे लागेल. कैलास नगरमधील पाणीटंचाई नेमकी कधी सुटणार आणि रहिवाशांना नियमित पाणीपुरवठा कधीपासून मिळणार, हा प्रश्न मात्र अजून कायम आहे.