सुरेंद्रनगरमध्ये कथित 'शुद्धीकरणा'च्या नावाखाली महिलेवर सामूहिक अत्याचार; नऊ जणांना अटक

गुजरातच्या सुरेंद्रनगर जिल्ह्यात एका विवाहित महिलेला मारहाण करून तिचे बेकायदेशीरपणे अपहरण करण्यात आले आणि तिच्यावर सामूहिक बलात्कार करण्यात आला, अशी धक्कादायक घटना उघडकीस आली आहे. या प्रकरणात पोलिसांनी दोन महिलांसह नऊ जणांना अटक केली आहे.

हा सगळा प्रकार कथित 'शुद्धीकरण' पद्धतीच्या नावाखाली घडला. महिलेचे दुसऱ्या एका पुरुषासोबत अनैतिक संबंध आहेत, असा आरोप तिच्यावर ठेवण्यात आला होता. या घटनेचा व्हिडीओ नंतर सोशल मीडियावर आला आणि त्यानंतर पोलीस कामाला लागले.

प्रकरण बाहेर कसे आले, याबद्दल पोलिसांनी सांगितले की, महिलेचा अपमान करण्यासाठी आणि तिच्यावर हिंसा करताना एक व्हिडीओ बनवला गेला होता. तो सोशल मीडियावर आल्यावरच हे सगळे उघड झाले. महिलेने सुरुवातीला स्वतः पोलिसांकडे संपर्क साधला नव्हता. मात्र समाजातील काही सदस्यांकडून माहिती मिळाल्यानंतर अधिकाऱ्यांनी कारवाई सुरू केली आणि आरोपींचा शोध घेतला.

सुरेंद्रनगरचे पोलीस अधीक्षक प्रेमसुख देलू यांनी सांगितले की, व्हिडीओबद्दल कळल्यानंतर महिलेचा ठावठिकाणा शोधण्यासाठी पोलिसांची अनेक पथके तैनात करण्यात आली. शेवटी महिलेचा पत्ता लागला. तिला पोलीस स्टेशनला बोलावण्यात आले, तिथे तिचा जबाब नोंदवण्यात आला आणि त्यानंतर तिला पोलीस संरक्षण देण्यात आले.

पोलिसांनी दिलेल्या माहितीनुसार, ही महिला आपल्या पतीला सोडून दुसऱ्या एका व्यक्तीसोबत राहत होती. तिच्या पतीने आणि नातेवाइकांनी तिचा पत्ता शोधून काढला आणि तिला जबरदस्तीने घरी आणले. घरी आणल्यानंतर तिला साखळदंडाने बांधण्यात आले. ती कशीबशी तिथून पळाली, पण आरोपींनी तिला पुन्हा पकडले आणि दोरखंडाने एका झाडाला बांधले.

त्यानंतर आरोपींनी त्या महिलेला आणि तिच्यासोबत असलेल्या पुरुषाला 'शुद्धीकरण' प्रथेच्या नावाखाली शारीरिक आणि मानसिक त्रास देणे सुरू केले, असे पोलिसांनी सांगितले. पोलीस म्हणाले की, अनेक पुरुषांनी त्या महिलेवर अत्याचार केले. इतकेच नव्हे, तर जेव्हा जेव्हा तिच्यावर बलात्कार होत होता, तेव्हा तेव्हा तो फोनमध्ये रेकॉर्ड केला जात होता. त्यातले काही व्हिडीओ सोशल मीडियावर व्हायरल झाले.

हे व्हिडीओ कोणी रेकॉर्ड केले आणि कोणी सोशल मीडियावर टाकले, याचाही पोलीस तपास करत आहेत. पोलीस अधीक्षक आर. एम. संगदा म्हणाले की, व्हिडीओ रेकॉर्ड करणारा आणि ते सोशल मीडियावर टाकून पैसे कमावणारा, अशा व्यक्तीचाही शोध घेतला जात आहे.

या गुन्ह्यात मदत करणाऱ्या दोन महिलांसह एकूण नऊ आरोपींना पोलिसांनी अटक केली आहे. अटक केलेल्या व्यक्तींची पार्श्वभूमी काय आहे आणि प्रत्येकाची भूमिका काय होती, याचाही तपास पोलीस करत आहेत.