इंदापूर, बारामतीत मुसळधार पाऊस; पुण्यात तापमान २९ अंशांवर

पुणे जिल्ह्यातील बारामती शहर, शहराच्या परिसरातील जिरायती पट्टा आणि इंदापूर तालुक्याचा बहुतांश भाग सोमवारी पहाटेपासूनच मुसळधार पावसाने अक्षरशः झोडपून काढला. बारामती शहरात सकाळी सात वाजेपर्यंत तब्बल १५८ मिलिमीटर पावसाची नोंद झाली होती.

त्यानंतरही सकाळी सव्वादहा वाजेपर्यंत पावसाचा जोर कायम राहिला. त्यामुळे एकूण पावसाचा आकडा १७० मिलिमीटरच्या पुढे गेला असण्याची शक्यता वर्तवली जात आहे. सध्या पुणे शहरासह जिल्ह्यातही मुसळधार पाऊस पडत असल्याचे दिसत आहे.

सध्या पुणे शहरात तापमान २९ अंश सेल्सिअसवर गेल्याचे दिसून येत आहे. सोमवारी सकाळी शहराच्या विविध भागांत पावसाने हजेरी लावली, तर दिवसभर आकाश ढगाळ राहिल्याने वातावरणात गारवा निर्माण झाला. सोमवारी शहरात कमाल तापमान २४ अंश सेल्सिअस, तर किमान तापमान २१.२ अंश सेल्सिअस नोंदवले गेले.

भारतीय हवामानशास्त्र विभागाने पुढील दोन दिवस पुणे शहर आणि परिसरात हलक्या ते मध्यम स्वरूपाचा पाऊस, तसेच मेघगर्जना आणि विजांच्या कडकडाटाची शक्यता वर्तवली आहे. या पार्श्वभूमीवर पुण्यासाठी येलो अलर्ट जारी करण्यात आला आहे.

बंगालच्या उपसागरातील तीव्र चक्रीवादळ मुरासू आणि अरबी समुद्रातील चक्रीय स्थिती यांमुळे पुण्यासह राज्यात पावसासाठी पोषक वातावरण निर्माण झाले आहे. शहर आणि परिसरात सोमवारी (ता. २) रात्रीपासून पाऊस सुरू असल्याने कमाल तापमानात आठ ते नऊ अंश सेल्सिअसने घट झाली आहे.

हडपसरसह पूर्व पुण्यातील विविध भागांत रात्री झालेल्या मुसळधार अवकाळी पावसामुळे रस्ते जलमय झाले. मध्यरात्रीच्या सुमारास पावसाला सुरुवात झाली. त्यानंतर पहाटे आणि सकाळी सात ते आठच्या सुमारास पावसाचा जोर वाढल्याने अनेक ठिकाणी रस्त्यांवर मोठ्या प्रमाणात पाणी साचले. मगरपट्टा सिटी, मुंढवा, केशवनगर, हडपसर, शिंदेवस्ती, रामटेकडी, महंमदवाडी, वानवडी, फातिमानगर, घोरपडी आणि कॅम्प परिसरात जोरदार पाऊस झाला.

खडकवासला धरणसाखळीतील चारही धरणांमध्ये मिळून सध्या २३.४७ टीएमसी, म्हणजेच ८०.५२ टक्के पाणीसाठा आहे. गेल्या वर्षी याच कालावधीत हा साठा २८.४० टीएमसी (९७.४१ टक्के) होता. त्यामुळे यंदा गेल्या वर्षीच्या तुलनेत साठा सुमारे पाच टीएमसीने कमी आहे. सोमवारी चारही धरणांमध्ये नव्याने पाण्याची आवक झाली.