राजसत्तेपेक्षा धर्मसत्ता मोठी, कुंभ संतांच्या आशीर्वादाने पार पाडू: उपमुख्यमंत्री शिंदे

राजसत्तेपेक्षा धर्मसत्ता श्रेष्ठ आहे, असे उपमुख्यमंत्री एकनाथ शिंदे यांनी त्र्यंबकेश्वर येथे सांगितले. तिथे आयोजित केलेल्या संत संमेलनात ते बोलत होते. संतांच्या पायाशी नतमस्तक होऊन राज्यकारभार चालवणे हाच आमचा संस्कार आहे, असेही ते म्हणाले.

भाषणाची सुरुवात त्यांनी भगवान त्र्यंबकेश्वर आणि गोदामाईच्या चरणी वंदन करून केली. देशभरातून आलेल्या संत-महंतांना त्यांनी अभिवादन केले. "साधू-संत येती घरा तोची दिवाळी दसरा" असे सांगत आज संतांमुळे खरी दिवाळी साजरी होत आहे, असे ते म्हणाले. हे केवळ राजकीय किंवा सामाजिक संमेलन नाही, तर आध्यात्मिक ऊर्जेचा उत्सव आहे, असे शिंदे यांनी नमूद केले.

बाळासाहेब ठाकरे आणि धर्मवीर आनंद दिघे यांनी राजकारण हे समाजकारण, राष्ट्रसेवा आणि राष्ट्ररक्षणासाठी करायचे, असा संस्कार दिला, असे शिंदे यांनी सांगितले. हातात राजसत्ता असली तरी अध्यात्मिक आणि धर्मसत्ता मोठी असते, असेही त्यांनी स्पष्ट केले.

संत ज्ञानेश्वर, नामदेव, एकनाथ, तुकाराम आणि समर्थ रामदास यांच्या संस्कारांनी महाराष्ट्र घडला, असे शिंदे म्हणाले. संतांनी भक्तीबरोबर माणुसकी, समता आणि समाजसेवा शिकवली. संत तुकारामांच्या "जे का रंजले गांजले" या विचाराचा दाखला देत, गरजूंची सेवा हाच खरा धर्म आहे, असे त्यांनी सांगितले.

दुष्काळग्रस्त शेतकऱ्यांच्या प्रश्नावर सरकार पूर्ण ताकदीने त्यांच्या पाठीशी आहे, असे शिंदे यांनी सांगितले. दुष्काळामुळे अडचणीत आलेल्या शेतकऱ्यांच्या मुलींच्या लग्नासाठी शिवसेना मदत करेल, अशी घोषणाही त्यांनी केली. कुंभमेळा हा केवळ श्रद्धेचा सोहळा नाही. पर्यटन, व्यापार, रोजगार, पायाभूत सुविधा आणि स्थानिक अर्थव्यवस्थेला चालना देणारा तो महोत्सव आहे, असेही ते म्हणाले.

शिवसेनेच्या वतीने 13 आखाड्यांतील संत-महंत आणि साधूंच्या भोजनाची व्यवस्था केली जाणार असल्याचे शिंदे यांनी जाहीर केले. "संतांची सेवा करणे हे आमचे भाग्य आहे," असे ते म्हणाले.

कुंभाच्या कामांमुळे बाधित होणाऱ्या कुटुंबांचे पक्क्या घरांसह पुनर्वसन केले जाईल, कुणावरही अन्याय होणार नाही, असे त्यांनी सांगितले. व्यापारी, दुकानदार आणि शेतकऱ्यांचे नुकसान झाले, तर सरकार मोबदला देईल. साधुग्रामच्या भूसंपादनाबाबतच्या तक्रारीही सोडवल्या जातील. त्र्यंबकेश्वर स्टेडियमसाठी भूसंपादनाची प्रक्रिया सुरू आहे आणि निधीचे नियोजन करण्यात आले आहे. नगरपरिषद प्रशासकीय भवनासाठी लागणारा निधी देण्याची ग्वाहीही त्यांनी दिली.

"माझ्या संपूर्ण राजकीय-सामाजिक जीवनातील हा पहिलाच आणि अत्यंत महत्त्वाचा कार्यक्रम आहे. संत-महंतांचा सन्मान करण्याचे हे सौभाग्य आहे. सीएम म्हणजे कॉमन मॅन; मी कार्यकर्ता म्हणून काम केले आणि पुढेही कार्यकर्ता म्हणूनच काम करणार," असे शिंदे म्हणाले.

मुख्यमंत्री आणि संपूर्ण मंत्रिमंडळाच्या सहकार्याने सिंहस्थ यशस्वी करण्यासाठी सरकार पूर्ण ताकदीने काम करेल, असे त्यांनी सांगितले. आखाडे, साधू-महंत, भाविक आणि स्थानिक नागरिकांना कोणताही त्रास होणार नाही, याची काळजी घेतली जाईल. "संतांच्या आशीर्वादाने हा कुंभ यशस्वी करू; कोणावरही अन्याय होऊ देणार नाही," असा विश्वास शिंदे यांनी व्यक्त केला.

संत संमेलनाला जगद्गुरू स्वामी शांतिगिरी महाराज, महंत महामंडलेश्वर शिवगिरी महाराज, महंत सत्यगिरी महाराज, महंत धनंजयगिरी महाराज, महंत शंकरानंद सरस्वती महाराज, महंत रमेशगिरी महाराज, महंत दुर्गानंद महाराज, महंत रामकिशोरदास शास्त्री, महंत दुर्गादास महाराज, महंत रामनवमीदास महाराज, महंत गोपालदास महाराज, संत देवेंद्रसिंह शास्त्री आणि धर्मवीर आध्यात्मिक सेनेचे प्रदेशाध्यक्ष अक्षय महाराज भोसले उपस्थित होते. विविध आखाड्यांचे महामंडलेश्वर, संत-महंत, धर्माचार्य आणि मान्यवरही हजर होते.

मंत्री दादा भुसे, आमदार सुहास कांदे, गोकुळ गीते, जिल्हाप्रमुख अजय बोरस्ते, विनय करंजे, विजय आमले, प्रवीण आमले यांच्यासह स्थानिक लोकप्रतिनिधी आणि पक्षपदाधिकारी मोठ्या संख्येने उपस्थित होते.