लोणी काळभोरचे राजेंद्र गायकवाड ५५ व्या वर्षी ICN स्पर्धेत दोन सुवर्णपदकांचे मानकरी

पन्नाशी उलटली की अनेकजण व्यायामापासून आणि फिटनेसपासून लांब जातात. वाढते वय, तब्येतीच्या तक्रारी आणि शरीराच्या मर्यादा डोळ्यासमोर ठेवून मेहनत घेणे टाळले जाते. पण वय म्हणजे फक्त एक आकडा असतो, हे जिद्दीच्या जोरावर दाखवून देणारी एक प्रेरणादायी गोष्ट पुणे जिल्ह्यातून पुढे आली आहे.

हवेली तालुक्यातील लोणी काळभोर येथे राहणाऱ्या राजेंद्र परशुराम गायकवाड यांनी वयाच्या ५५ व्या वर्षी आंतरराष्ट्रीय बॉडी बिल्डिंग स्पर्धेत दोन सुवर्णपदके पटकावली. आशियातील प्रतिष्ठित आणि अतिशय कठीण मानल्या जाणाऱ्या ICN नॅचरल बॉडी बिल्डिंग स्पर्धेत त्यांनी मेन्स क्लासिक फिजीक आणि मेन्स फिजीक या दोन्ही प्रकारांत पहिले स्थान मिळवले.

गायकवाड यांची सुरुवात मात्र सोपी नव्हती. २०१७ मध्ये त्यांचे वजन तब्बल ९७ किलो होते. डोकेदुखी सतत मागे लागलेली होती, बीपी आणि शुगरचाही त्रास होता, आणि पेनकिलर्सवर अवलंबून राहावे लागत होते. याच परिस्थितीतून बाहेर पडायचे, असा निर्धार त्यांनी केला.

त्याच २०१७ मध्ये मित्र सचिन तात्या तुपे यांनी त्यांना ट्रेकिंगची ओळख करून दिली. आधी फक्त आवड म्हणून ते ट्रेकिंगला जाऊ लागले. पण डोंगर चढताना शरीराचा कस लागतो, त्यामुळे त्यांना व्यायामाची गोडी लागली आणि तब्येतीकडे ते जास्त गांभीर्याने बघू लागले.

पुढे २०१८ मध्ये त्यांनी जिम लावण्याचा निर्णय घेतला. त्याच काळात एका मित्राने त्यांना आव्हान दिले, "सिक्स पॅक काढलेस तर दोन लाख रुपये देतो." गायकवाड यांच्यासाठी ही पैज फक्त पैशांची नव्हती, तर स्वतःला सिद्ध करण्याची संधी होती. या पैजेने आयुष्याला नवी दिशा दिली, आणि तिथून सुरू झालेला व्यायामाचा प्रवास आता आंतरराष्ट्रीय सुवर्णपदकापर्यंत येऊन पोहोचला आहे.

स्वतःला सिद्ध केल्यानंतर त्यांनी बॉडी बिल्डिंग स्पर्धांमध्ये उतरायचे ठरवले. याआधी ते तीन वेळा स्पर्धेत उतरले होते, पण हवे तसे यश मिळाले नव्हते. तरीही त्यांनी हार मानली नाही. प्रत्येक स्पर्धेतून काही शिकत त्यांनी आपली तयारी सुधारण्यावर भर दिला.

यंदा ते ICN नॅचरल गोवा आंतरराष्ट्रीय बॉडी बिल्डिंग स्पर्धेत उतरले आणि दोन वेगवेगळ्या प्रकारांत त्यांनी आपली ताकद दाखवली. समोर आशियातील सर्वोत्तम बॉडी बिल्डर्स होते. अशा तगड्या स्पर्धकांसमोर आपल्या ताकदीच्या आणि मेहनतीच्या जोरावर त्यांनी बाजी मारली. या कामगिरीमुळे लोणी काळभोरसह पुणे जिल्ह्याच्या शिरपेचात मानाचा तुरा रोवला गेला आहे.

ICN ही नॅचरल बॉडी बिल्डिंगला प्रोत्साहन देणारी आंतरराष्ट्रीय संघटना आहे. तिच्यातर्फे वेगवेगळ्या देशांत बॉडी बिल्डिंग आणि फिटनेस स्पर्धा भरवल्या जातात. ICN नॅचरल गोवा ही भारतातील फिटनेसप्रेमी आणि बॉडी बिल्डर्ससाठी महत्त्वाची स्पर्धा मानली जाते. नैसर्गिक पद्धतीने शरीर कमावणाऱ्या खेळाडूंना प्रोत्साहन देणे, हे तिचे वैशिष्ट्य आहे. यात शरीराची ठेवण, स्नायूंची स्पष्टता, शरीरातील समतोल, पोझिंग, स्टेजवरील सादरीकरण आणि एकूण फिटनेस पाहून गुण दिले जातात.

स्पर्धेत मेन्स फिजीक, क्लासिक फिजीक, बॉडी बिल्डिंग, स्पोर्ट्स मॉडेल आणि फिटनेस मॉडेल असे वेगवेगळे प्रकार असतात. शिवाय ४० वर्षांवरील आणि ५० वर्षांवरील खेळाडूंसाठी स्वतंत्र मास्टर्स कॅटेगरी आहेत, त्यामुळे सगळ्या वयोगटांतील खेळाडूंना आपले कौशल्य दाखवता येते.